ՄԱՄՈւԼԻ ՀԱՂՈՐԴԱԳՐՈւԹՅՈւՆ11.09.2024
Կենտրոնական բանկն ընդլայնում է հրապարակվող տեղեկատվության շրջանակը
Նպատակ ունենալով բարձրացնել Կենտրոնական բանկի ֆինանսական գործառնությունների թափանցիկությունը, ինչպես նաև բարելավել ֆինանսական շուկաների վերաբերյալ վիճակագրությունը՝ Կենտրոնական բանկն ընդլայնում է իր պաշտոնական կայքում հրապարակվող տեղեկատվության շրջանակը:
Մասնավորապես, ի լրումն առկա վիճակագրության՝ այսուհետ հրապարակվելու են հետևյալ ցուցանիշները.
- Կենտրոնական բանկի կողմից աճուրդով իրականացվող գործառնություններն արտարժութային շուկայում` ըստ առանձին գործարքների (գործարքի իրականացման դեպքում),
- Կենտրոնական բանկի կողմից հաճախորդների հետ իրականացվող արտարժութային գործառնությունները` ըստ հաճախորդների (շաբաթական),
- Առևտրային բանկերի կողմից իրականացված արտարժույթի առքի և վաճառքի գործառնությունները՝ ըստ տնտեսության ճյուղերի, հաճախորդի ռեզիդենտության և գործարքի կանխիկ/անկանխիկ տեսակի (օրական),
- Առևտրային բանկերի կողմից իրականացված արժութային ֆորվարդ գործարքների մասին տեղեկատվությունը՝ ըստ արժույթի, ժամկետայնության, հաճախորդի ռեզիդենտության և գործարքի կողմերի տեսակի (օրական),
- Կենտրոնական բանկի ամփոփ հաշվեկշռում բանկերի թղթակցային հաշիվների մնացորդը՝ ըստ թղթակցային և այլ հաշիվների մնացորդների (օրական),
- Միջբանկային և այլ ռեպո գործառնությունների մասին տեղեկատվությունը՝ ըստ արժույթի, ժամկետայնության, գործարքի կողմերի տեսակի և հիմքում ընկած պարտատոմսի տեսակի (օրական),
- ՀՀ պետական պարտատոմսերով (նաև եվրոպարտատոմսերով) երկրորդային շուկայում կատարված միջբանկային և այլ գործառնությունները՝ ըստ գործարքի կողմերի տեսակի (օրական),
- Առևտրային բանկերի՝ արտարժույթով պահուստավորման ենթակա գումարները (ամսական),
- ՀՀ արժութային սփոթ շուկայի շրջանառությունը՝ ըստ բանկերի և վարկային կազմակերպությունների (օրական),
- ՀՀ արժութային սփոթ շուկայի շրջանառությունը՝ ըստ փոխանակման կետերի (շաբաթական)։
Նախատեսվող փոփոխությունները միտված են ավելացնելու Կենտրոնական բանկի թափանցիկությունը և բարելավելու ֆինանսական շուկաների վիճակագրությունը։ Հրապարակվող տեղեկատվության շրջանակի ընդլայնումը կրելու է շարունակական բնույթ:
_____________________________________________________________________
Հաղորդագրությունից օգտվելու դեպքում հղումը սկզբնաղբյուրին պարտադիր է:
ԿԲ հասարակայնության հետ կապերի ծառայություն
հեռախոս. (374-10) 592592-0702
էլ-փոստ.
mcba@cba.am
www.cba.am